Tips Aman jo Nyaman Maninggakan Rumah di Rantau Katiko Pulang Kampuang.
Dek ko bulan puaso sarato dakek pulo ka rayo lai. Mungkin kami (admin)
labiah acok maagiah tips ka sanak sadonyo, sabalunyo MinPres lah
mamposting Tips Pulang Kampuang jo Pesawat, nan Kini giliran ambo lo
maagiah "tips Aman jo Nyaman Maninggakan Rumah di Rantau Katiko Pulang
Kampuang".
1. Pastikan sanak punyo rumah di rantau.
Rumah surang ataupun mangontrak, jan beko urang lah sibuk mangunci
rumah, sanak sibuk mangunci hati karano pengen Move On. Kehkehkeh
2. Pastikan sado pintu jo jendela rumah nan sanak tinggakan pulang
kampuang takunci rapek sadonyo, kok dapek samuik sajo ndak bisa masuak,
jan pintu jo jendela rumah tetangga sanak lo nan bakunci, apo lai pintu
hati sanak sato pulo takunci. Jaaan...
3. Pareso sado peralatan dapua,
Sarupo Kompor, magic, CoolCash jo peralatan elektronik lainyo mati
sadonyo. Jan sampai kompor sadang hiduik sanak tinggakan, Main kambang
api rumah sanak beko. Tabaka.
4. Kok sanak mamakai kompor Gas,
apo lai pakai tabuang gas Hulk (warna Hijau, barek 3kg, berdaya ledak
tinggi nan diagiah pemerintah ) sarancaknyo sanak suruah tabuang gas tu
sato puaso, bia agak susuik bareknyo. Kan kalau malatuih ndak gadang
bana latuihnyo.
5. Kok barek juo hati sanak takuik ka malatuih
maninggakan tabuang gas hulk 3kg dari pemerintah tu, rancak sanak bao
tabuang gas tu kalua rumah, bukak ujuang tabuangnyo supayo gasnyo kalua,
siap tu agiah api, malatuih tu mah. Jadi ndak ado nan ka malatuih lai.
6. Bapasan ka urang dakek rumah.
Sabalun pulang kampuang, sarancaknyo sanak tinggakan pasan ka urang
dakek rumah sanak nan indak pulang kampuang atau nan asli situ.pasankan
"Tolong jago-jago juo rumah ambo yo da/ni/pak/tek, caliak-caliakan juo,
kok mada-mada nyo lacuik se jo lidih, kok ndak jantiak talingonyo."
Jan tinggaan pasan cinto. Apo lai pasan terakhir.
7. Kalau ka barangkek maninggakan rumah, jan lupo baco do'a, salamaik
juo sampai kampuang. Jan sanak baco pulo Koran, apo lai sanak baco pulo
postingan Tips Dari ambo ko. Kariang gigi sanak dek dek senyum se
sapanjang jalan beko. Wkwkwkwk .
Salamaik Pulang kampuang
untuak sanak nan dirantau, semoga Rayo tahun ko kito samo-samo manjadi
pribadi nan marasokan kamanangan di hari nan fitri.
Kehkehkeh...
Sumber : https://www.facebook.com/pages/Carito-Minang-Lucu/415156771855945?ref=ts&fref=ts
Senin, 29 Juli 2013
Tips Aman jo Nyaman Maninggakan Rumah di Rantau Katiko Pulang Kampuang
Tips Aman jo Nyaman Maninggakan Rumah di Rantau Katiko Pulang Kampuang
Reviewed by Unknown
on Senin, 29 Juli 2013
Rating: 4.5
Label:
1. Artikel,
Informasi Sumbar,
minangkabau,
tips
0 komentar:
Posting Komentar